A lingua hè viva... Ci tocca à parlà

En présence de nombreux élus, la Collectivité Territoriale de Corse et le SCB ont signé hier soir une convention en faveur de la langue Corse, sous le slogan "A lingua hè viva, ci tocca à parlà". Les joueurs bastiais portaient d'ailleurs ce message fort sur leur maillot. Ces derniers suivront des cours de langue dès la saison prochaine.

Sò avà parechji anni chì u populu turchinu s'hè ingagiatu da veru à favore di a nostra lingua. Dipoi tant’ anni, i sustenidori portanu a nostra sguatra cantendu in lingua corsa. Hè ciò chì face a nostra identità, è chì dà, à i nostri, forza è curagiu per vince.

U Sporting Club di Bastia dinù ellu, face i sforzi pè prumove a lingua : in a signalètica, a cumunicazione, è da quì à pocu cù u so situ internet chì serà traduttu.

Oghje, un passu impurtante hè statu francatu. U Sporting hà firmatu a càrtula di a lingua Corsa, pruposta da a Cullettività Territuriale di Corsica.
Sta càrtula permetterà d'arradicà ancu di più a lingua corsa in a vita di u Sporting : seranu dati corsi di Corsu à i giovani di u centru di furmazione, per trasmetteli i valori chì facenu a nostra forza.

Sta sera, i nostri ghjucadori purteranu in pettu un messagiu forte. Nant’à e so maglie ci serà scrittu : « A lingua hè viva, ci tocca à parlà ». Cusì, a CTC mostra u so sustegnu è u so attaccamentu à u Sporting è à a lingua corsa.

Ma hè tutti inseme chì ci tocca à difende a nostra lingua : parlèmula, cantèmula, fèmula campà. A nostra lingua a ci l'anu vulsuta assuffugà, quant'elli anu vulsutu ammazzà a nostra sguatra. Ma treminduie, i Corsi l'anu difese. Dopu à stonde difficiule, oghje èscenu da u bughju è rinviviscenu tutt'è duie, manu ind'a manu.

U messagiu hè forte : a nostra lingua è a nostra sguatra, mai ùn mureranu ! Sò u nostru sangue, e nostre carne, è nimu e ci piglierà mai.

Sapemu tutti chì u Sporting hè più ch'è un club. Hè u porta bandera di a nostra identità è di u nostru populu. Quì ind’è noi, è per inghjilocu in stu mondu duv’ellu ci hè qualchì Corsu. A nostra lingua, puntellu maiò di a nostra essezza ùn ne pudia esse disciolta.

Avà caminanu inseme ancu di più, è nimu l’hà più da parà.

UNITI VINCEREMU, EVIVA BASTIA !!!

En savoir plus...

À lire également

Ricevete a lettera